Psalms 16

PESALEM 16

Anôtô kêtu nê lau nêŋ awamata

1O Anôtô, ojop aê
gebe aê gaê lamu aôm.
 2Aê kasôm gêdêŋ Apômtau gebe “Ŋoc ŋatau aôm.
Ŋoc gêŋ ŋajam ŋam aôm taômgeŋ.”
 3Lau dabuŋ nomŋa êsêac lau ŋaŋêŋ.
Êsêac sêjac aê matocanô ŋajam.
 4Lau taŋ sêjaliŋ anôtôi jaba sa naŋ, oc sêôc gêŋwapac taêsam.
Aê jakêŋ da decŋa êndêŋ êsêac atom, ma êsêacnêŋ ŋaê êsa aocsuŋ atom.

5Apômtau kêtu ŋoc gêŋlênsêm ma ŋoc gêŋ, taŋ gawê kaiŋ naŋ.
Aôm gojob ŋoc lêŋlênsêm ŋapep.
 6Sêjac belo gamêŋ e katap ŋoc gamêŋ ŋajam sa.
Biŋŋanô, aê galic ŋoc gêŋlênsêm e gêjac matocanô ŋajam.

7Aê aoc gêjac Apômtau, gebe kêtu ŋoc gêjam-sawaga ŋajam.
Gêdêŋ gêbêc atêc kepeŋ aê kêtu biŋ tonaŋŋa gêwiŋ.
 8Aê kakêŋ Apômtau kêkô laŋôcnêm-ŋageŋ gebe matocanô êpi eŋ endeŋ tôŋgeŋ.
Eŋ kêkô ŋoc anôŋa, tec aê oc jakô teŋgeŋ.

9Amboac tonaŋ ŋoc ŋalêlôm ŋajam to ŋoc katuc kêtu samuc,
ma aê ôlic gêŋgôŋ ŋajam.
 10Gebe aôm oc ôwi ŋoc katuc siŋ êndêŋ lamboam atom.
Aôm oc ôkêŋ sê êŋgamiŋ nêm ŋac mansaŋ ôli tôŋ atom.

11Aôm kôtôc intêna jaŋgôŋ matoc jaliŋa gêdêŋ aê.
Aê jamoa aôm laŋômnêmŋa totêtac ŋajam samucgeŋ ma jatap lêmam anôŋa ŋamoasiŋ sa endeŋ tôŋgeŋ.
Dawidnê mec teŋ.
Copyright information for JAE